Шеснасте реалне стретнуце

Шеснасте реалне стретнуце

Кухар

31.03.2014. отримане шеснасте реалне стретнуце, на хторим ше школяре упознали зоз занїманьом КУХАРА. Стренуце реализоване зоз професионалцами, кухаром Михайлом Оросом и кухарками Таню Бики и Весну Макаї.

Перша часц самого представяня занїманя була унаприямена на сами простор хтори єдна кухня, дзе кухаре и робя, представя. Кухар Михайло детельно потолковал обовязни часци єдней професионалней кухнї, дзе дзецом и поуказовал просториї у хторих и вон сам роби. Починаюци од просториї за шалати, прейґ просторийох за груби обробок поживи, та по шпайз.

У другей часци упознаваня, школяре видзели машини зоз хторима кухня розполага, судзини хтори ше хасную за варенє єдзеня, шпоргети на хторих ше вари и алат зоз хторим єден кухар професионалєц каждодньово роби.

У трецей часци презентациї того занїманя, кухар Михайло детально потолковал хтори то предносци того занїманя, и хтори нєдостатки, цо найкрасше, а цо менєй красне у роботи, хтору школу треба уписац кед ше жада постац кухар, дзе шицко мож найсц роботу, як випатра робиц на морю, яка робота кухара на ладї, и велї други питаня хтори школярох цикавели, док за тот исти час, кухарки Таня и Весна, школяром приказали як ше правя палачинки и цо потребне шицко од состойкох же бизме даскельо палачинки и упражели. 

На концу, зоз продуктами роботи кухарох хторих зме нащивели, школяре ше мали нагоду и засладзиц, тако же шицки палачинки до конца стретнуца були и поєдзени.

Окремне задовольство було зоз школярами поприповедац о упечаткох после стретнуца, кед школярка Тамара потоловала як ше прави кремпита, а Боян описал процес правеня бухтох.

Петнасте реалне стретнуце

  Петнасте реалне стретнуце

 Хладзальня „АBC food“

Стреду, 26. 03. 2014., школяре VII и VIII класи нащивели хладзальню змарзнутей желєняви ABC Food дзе мали нагоду стретнуц ше зоз шлїдуюцима занїманями: технолоґом, руководительом роботи, машинбраваром, електричаром, компресористом, лаборантом, маґазионером и другима роботнїками.

Будински Блаженка, дипломовани технолоґ и руководитель роботи,  школярох упознала зоз цалим обєктом фабрики у хторим мали нагоду видзиц погони за преробок и продукцию желєнави:  линиї за преробок желєнави (гращку, сладкей кукурици, мархви, кромпльох, цибулї, броколия, карфиолу и паприґи), машину за бланширанє односно баренє, линиї за преберанє и ґрупованє желєняви, комори у хторих ше желєнява  змарза и одклада до бокс палетох, комори односно складища до хторих ше одклада и чува желєнава зоз  температуру -20 ступнї и обєкти за пакованє желєнави.

Упознали ше зоз машинами як цо то миксер змарзнутей желєняви наменєни за пропорционалне дозиранє и мишанє до 5 компонентох змарзнутей ґрануластей желєняви, автоматични машини “пакерици” за пакованє до картонских шкатулох и натрон паперових кесох розличних килажох.

       

Потим нащивели браварску роботню за отримованє погонох и машинох дзе майстрове браваре представели їх роботу, указали машини на хторих робя и алат, приповедали о знаню хторе потребне и чежини самей роботи. У погону за компресори, майстрове потолковали функционованє компресорох и указали на вельку одвичаюельносц їх занїманя. У лабораториї мали нагоду чуц як ше контролує квалитет поживи, а маґазионер виприповедал свойо задлуженя у єдней змени. На концу нащивели и комерциялу у хторей роботнїци задлужени за водзенє паперох и набавки випроповедали зоз чого ше шицко состої їх робота.

Школяре ше интересовали кельо ше рочнє желєняви випродукує, яки роботни час, хтори школи потребни за поєдинєчни занїманя, прецо любя свою роботу и яки почежкосци на тей роботи...

Нащивели зме и мензу у фабрики дзе нас послужели зоз варену сладку кукурицу.

педаґоґ Мария Шанта, наставнїца Златица Малацко и Биляна Роман

Штернасте реалне стретнуце

Штернасте реалне стретнуце

Подприємство „Изґлед“

Дня 08. 04. 2014. школяре нащивели подприємство „Изґлед” хторе ше занїма зоз виробком меблю по мери и зоз услужним резаньом плочастого материялу, а на розполаганю пилана и будовательни материял.

Домашнї упознали школярох як випатра цали процес кед купец крочи до салону же би наручел одредзену файту меблю та до готового продукта. Рушели зме од  викладацкого салона дзе муштериї можу видзиц готови продукти як модели и дзе руша догварка о випатрунку мебля, його димензийох, фарби, форми и цени. Модел ше перше скицира на папер, даваю ше предкладаня и вец ше го дизайнира з помоцу рахункара же би купец мал яснєйшу представу о його випатрунку. Потим школяре могли видзиц зоз яких материялох ше вирабя мебель. Майстор фаховец нам розтолковал яка розлика медзи розличнима файтами материялох, яка розлика медзи древом, иверицу и медияпаном зоз  хторим найвецей робя прето же є найвитримовнєйши и найвецей глєдани. Видзели хтори шицко фази потребни за виробок меблю: резанє, формованє, фарбенє, склапянє. Мали нагоду видзиц рижни роботнї як цо то струґарска, ґатерска роботня, фарбара и сушара. Стретли ше и зоз рижнима машинами за обробок материялу.

Дознали зме же ше подприємство занїма зоз опреманьом стамбених обєктох, квартельох, канцеларийох, ресторанох, та и єдней апатики и же ше асортиман услугох нєпреривно преширює.

Цо ше дотика професиї, велї роботнїкове робя вецей и розлични роботи, а шицко ше научи през праксу, столар часто роби и фарбарску роботу, декоратерску часц, консруованє, превоз и маркетинґ. Маркетинґ тиж барз важна часц тей роботи: виробок проспектох, рекламованє на интернету, участвованє на саймох, а найлєпша реклама то сам квалитет роби.  Вше векша важносц ше придава и сучасним технолоґийом, як цо то дизайнованє и проєктованє, хтори олєгчую и пошвидшую роботу алє поглєдую и преширйованє знаня роботнїкох.

наставнїкове Славомир Папуґа и Биляна Роман

Тринасте реалне стретнуце

Тринасте реалне стретнуце

Стретнуце зоз туристичним тенїчаром

 02.04.2014.  7,55

Професорка Веселинка Бачич дзечнє и приємно дочекала школюрох 7. и 8. класи и успишно им презентовала напраям туристичного технїчара у Основней и штреднєй школи Петро Кузмяк, у Руским Керестуре.   

Професорка им потолковала же яки предмети их чекаю кед же ше упишу на тот напрям. Тиж, и школяре ше уключовали до бешеди и одвитовали на питаня котри школяре поставяли.

Школяром основней школи школяре штреднєй школи приповедали о своїх искуствох и причинох же прецо вибрали праве тот напрям за дальше школованє.

       Тиж, приповедали и о своїх приємних, алє и нєприємних искуствох та спрам того, школяре основней школи маю реалнєйшу слику о тим напряме.                                                                                                                            

Каролина Папуґа

Дванасте реалне стретнуце

Дванасте реалне стретнуце

Тапетария „Comfort“

Штварток, 27. 03. 2014. школяре нащивели тапетарию „Comfort“. Школярох привитал  поднїматель Иґор Рац хтори их упознал зоз цалим обєктом и виприповедал зоз чим ше тото подримємство занїма, а то продукция тапацираного меблю и предаванє на велько. Школяре могли чуц яка файта меблю ше продукує у тей тапетарскей роботнї, зоз якого материялу, зоз хторих часцох ше состої, кельо ше меблю випродукує односно яка дньова норма. При обиходзеню видзели рижни хали хтори служа як складища за готови часци меблю, за материял зоз хторого ше мебель вирабя, хали у хторих робя роботнїци и канцелариї у хторих ше водзи подприємство.

Потим им Иґор виприповедал о маркетиншкей часци роботи: находзенє тарґовища, догварянє роботи, догварянє коло цени продуктох, вивоженє роби, важносц рекламованя, провадзенє трендох, односно дизайну, одкадз приходзи тренд, хто го диктира, як ше швидко зменює, кельо важни квалитет роби, почитованє купца и рок випоручованя роби. Школяре могли поопатрац палету текстилних материялох, каталоґи и презентацию продуктох.

Школяре и настванїкове ше интересовали дзе ше мебель найвецей вивожи, хтора жем найвекши купец, одкаль ше набавяю материяли и хтори тераз актуелни, од кеди и на яки способ ше розвила тапетарня, на яки способ подприємство достало назву и лоґо, чи роботнїци квалификовани за тоту роботу и хтора школа потребна за тоти занїманя.

Ушлїдзела прктична робота. Школяре  розподзелєни на розлични роботни места на хторих им роботнїци указали цо їх задаток. Дзивчата мали задаток польнїц заглавчки зоз шпундїю, чисциц заглавчки, мерац и штригац цибзари на одредзену длужину, скравац и виштриговац часци за заглавчки зоз платна, скравац и штригац  кофлин за рижни часци меблю. Хлапци мали задаток збивац часци меблю як цо то корунки, чамец и наслон, обкладац их зоз шпундїю, кофлином и материялом, паковац часци меблю. На тот способ ше стретли зоз машинами,  алатом и материялами хтори ше хасную у тапетариї.

Школяре робели у приємней атмосфери зоз роботнїками хтори им дзечнє указовали свою роботу и помагали кед требало.У просториї за розвагу були понукнути зоз соком и кексами, а на самим початку  достали пенкала и нотеси же би могли правиц призначки под час реалного стретнуца у тапетарнї.

 На концу Иґор оценєл роботу каждого школяра.